(Person i dënuar nga regjimi komunist)
Lindi më 3 shkurt të viti 1939, në Mamurras të Kurbinit. U arrestua më 24 prill të vitit 1958. Më 11 qershor 1958 Kolegji Ushtarak i Gjykatës së Lartë e dënoi «për tradhti ndaj atdheut mbetur në fazën e përgatitjes për t’u arratisur jashtë shtetit me 6 (gjashtë) vjet heqje lirie, konfiskimin e pasurisë së luajtshme dhe të paluajtshme dhe me humbjen e së drejtës elektorale për dy vjet kohë». U lirua më 2 qershor 1963. Që pas daljes nga burgu, e deri në vitin 1990 punoi si specialist ndërtimi në Ndërmarrjen NSHN Banesa të Laçit. Në vitin 1992 u emërua drejtor i Ndëmarrjes Komunale të Laçit. Në vitin 1995 u emërua shef i administratës në Drejtorinë e Personelit të Ministrisë së Jashtme. Më 1997, me kërkesën e tij u largua nga ai dikaster dhe u emërua shef i shërbimeve dhe marrëdhënieve me jashtë, si dhe nënkryetar në Bashkinë e Mamurrasit. Më 2006 filloi punë në drejtorinë e Shërbimit Diplomatik. Është autor i librave: «Saipi» (tregime), «Kodra e Kovaçit» (roman), «Dasëm në vjeshtë» (roman; Enti Botues «Gjergj Fishta»). Republika Popullore e Shqipërisë, Gjykata e Lartë, «Kolegji Ushtarak», Nr. 71 i Radhorit themeltar, Nr. 2 i Vendimit; Republika e Shqipërisë, Ministria e Drejtësisë, Zyra e Gjendjes Gjyqësore, Vërtetim i Gjendjes Gjyqësore Nr. 4218 i Prot.; Republika e Shqipërisë, Ministria e Brendshme, Sektori i Arkivit Shtetëror të Sistemit, Vërtetim, Nr. 1717/1 i Prot.
Burimi:
● Fjalori enciklopedik i vikt. të terr. kom. – VËLLIMI I
● Portali — Historia Shqiptare: Krimet e komunizmit