EKSPEDITA OSMANE KUNDËR MALËSISË SË MADHE
✤ (1612). Një nga ekspeditat ndëshkimore që ndërmori Stambolli në kuadrin e luftës kundër «Maleve Shqiptare», vatër e qëndresës së armatosur. Ekspedita u drejtua kundër Malësisë së Madhe, e cila ruante vetëqeverisjen me këmbëngulje, duke mos lejuar vendosjen e pushtetit osman dhe të spahinjve në këtë krahinë. Ushtria osmane prej 25.000 vetash u përqendrua në Podgoricë dhe prej andej organizoi sulme në disa drejtime për të depërtuar në thellësi të Malësisë së Madhe. Luftimet zgjatën rreth 3 muaj, osmanët i mbajtën malësorët nën goditje të vazhdueshme por pa sukses. Pasi dogjën Palabardhin, u detyruan të tërhiqeshin duke lënë mjaft spahinj të vrarë.

(E.S.)

Burime, referenca dhe shënime:
● Fjalori Enciklopedik Shqiptar (1985)
● Artikulli origjinal – Ekspedita Osmane Kundër Malësisë Së Madhe