BLETA SHQIPTARE
✤ Përmbledhja më e plotë e folklorit shqiptar në shek. XIX. U botua më 1878 në Aleksandri nga Thimi Mitko (shih). Vëllimi hapet me proverbat dhe vazhdon me gjëzat, emrat e njerëzve, këngët e ritet e ditëve të shënuara të vitit, këngët e dasmës, të dashurisë, të trimërisë, këngët gegërishte, përrallat dhe mbyllet me një fjalor shpjegues të fjalëve krahinore që përmbajnë tekstet folklorike. Lëndën autori e mblodhi kryesisht në mërgim (në Egjipt) nga kurbetarë (punëtorë, zanatçinj etj.) të krahinave të ndryshme të Shqipërisë sidomos të Jugut. Janë paraqitur edhe këngë popullore të arbëreshëve të Italisë dhe të Greqisë. Vepra dëshmonte njësinë kombëtare të kulturës popullore, përpjekjet për çlirimin e popullit shqiptar, si edhe aftësitë e tij krijuese. Botimi i saj në prag të ngjarjeve të Lidhjes Shqiptare të Prizrenit shërbeu si mjet kulturor, por edhe politik, si një mbështetje për të hedhur poshtë vendimet e padrejta të Kongresit të Berlinit. Ajo u prit me interes edhe nga opinioni shkencor i huaj si dëshmi e folklorit të njërit prej popujve më të lashtë të Ballkanit. Ribotimi më i plotë dhe shkencor është bërë në Thimi Mitko-Vepra (T. 1981).

(Q. H.)

Burime, referenca dhe shënime:
● Fjalori Enciklopedik Shqiptar (1985)
● Artikulli origjinal – Bieta Shqiptare
● Bleta shqiptare në orgjinal