Birra, lëndët e para për prodhimin e saj.

Birra është pije freskuese alkoolike, që përftohet nga fermentimi alkoolik i maltit të elbit, pordhe të drithrave të tjerë si orizi, misri, thekra, duke shtuar lupul me qëllim aromatizimin, dhënien e shijes së hidhur dhe e ngopur me gaz karbonik (CO₂). Prodhimi i  birrës i ka fillimet e veta rreth 6000 vjet më parë, në Babiloninë e lashtë.

Lëndët e para e ndihmëse për prodhimin e birrës janë: elbi; majaja (tharmi) e familjes Sacharomyces cervisiae; lupuli (Humulus-Lupulus); uji.

Prodhimi i birrës kalon në këto faza: Përgatitja e maltit; Prodhimi i birrës.

1. Përgatitja e maltit. Elbi zhytet në ujë derisa të mbijë pjesërisht, pastaj thahet duke marrë ngjyrë të errët. Prodhimi i maltit kalon në këto faza:

                Pastrimi → klasifikimi i elbit →  njomje  →  mbirje →  tharje.

2. Prodhimi i birrës kalon në disa etapa kryesore:

• Malti bluhet në mulli e kalon në procesin e zjerjes për përgatitjen e mushtit.
• – Përgatitja e mushtit. Mushti përgatitet nga malti i bluar e uji. Rolin kryesor gjatë përgatitjes së mushtit e kanë amilazat, që shndërrojnë amidonin në maltozë të fermentueshme e dekstrinë të fermentueshme. Mushti zakonisht përgatitet në temperaturën 55-65^o

– Shtohet lupuli në ekstrakt e përzierja zjehet. Pas zierjes mushti i ngrohtë kullohet e ftohet. Ftohja e mushtit ka për qëllim uljen e temperaturës së mushtit deri në temperaturën e fermentimit të tij. Masa ftohet nga 100⁰C  në 7-18⁰ C dhe kalon në rezervuarët e fermentimit ku shtohet majaja.

• Gjatë këtij procesi ndodh fermentimi alkoolik, që transformon sheqernat në alkool e CO₂. Formimi i alkoolit etilik e CO₂ ndodh si rezultat i veprimit të majave. Ky proces nuk zhvillohet kurrë vetëm, por krahas tij zhvillohen dhe procese të tjera.

Në prodhimin e birrës njihen 2 mënyra kryesore fermentimi:

a-  fermentimi i lartë zhvillohet në temperaturën 15-25^oC me maja të pastër. Majatë gjatë fermentimit dalin në sipërfaqe. Koha e fermentimit është e shkurtër 2-3 ditë dhe pas një stazhionimi jo të gjatë kalon për konsum.

b-  fermentimi i ulët zhvillohet në temperature të ulta 5-9^oC me maja të përshtatshme për temperatura të ulta, që gjatë fermentimit depozitohen në fund të vaskës.

Procesi fermentimit zgjat në varësi nga: përqëndrimi i mushtit; lloji i birrës; mënyra e fermentimit.

• Stazhionimi (vjetërimi) i birrës, që quhet ndryshe fermentimi përfundimtar kryhet në temperature 0-2^o Çdo tip birre ka kohën e saj për tu stazhionuar. Zakonisht birra stazhionohet për një kohë 1-3 muaj.
• Filtrimi i birrës. Kthjellimi i birrës bëhet me filtrim/centrifugim. Gjatë këtij procesi largohen substancat në gjendje pezullie.
• Pasterizimi Birra e zakonshme ruhet rreth 8 ditë. Për rritjen e qëndrueshmërisë së birrës në mjaft raste preferohet pasterizimi i saj. Temperatura e koha e pasterizimit zgjidhen duke u nisur nga koha që duhet të ruhet birra.
• Ambalazhimi, magazinimi. Pas procesit të kthjellimit birra kalon për mbushje. Mbushja mund të realizohet në ambalazhe të ndryshme.
• Defektet në prodhimin e birrës. Të metat e sëmundjet e birrës ndikojnë në pamjen, ngjyrën, shkumën, shijen, aromën e saj.

Shërbimi i birrës: Shishet hapen në prani të klientit. Temperatura e shërbimit të birrës 8-10ºC. Dhomat e ruajtjes së birrës duhet të jenë në temperaturë 6-8ºC.